Gaur aurkeztu du Behatokiak "Maite ditugulako" dokumentala Iruñeko Golem Yamagutxi zinema aretoan. Bertan Vascuencearen legeak Nafarroa Garaiko Hegoaldean eragiten dituen kalteak azaldu egiten dira, eta biktimen testigantza zuzenak jaso. Argi Rus eta Lurdes Mendibil Artaxoa eta Mendigorriako amek, hurrenez hurren, haien bizipenak kontatzen dituzte. Egunero kilometro anitz ibili behar dituzte haien seme-alabek euskaraz ikasi ahal izateko. Horrek kostu ekonomiko handia du, eta batzuetan erreparatu ezineko ondorioak, 1999. urtean bezala. Adrian Marturet auto istripuan hil egin zen eskolara zihoala.

Garbiñe Petriatik Vascuencearen Legea berehala indargabetzeko eskatu du aurkezpenean, eta Nafarroako Gobernuari zuzendu zaio zuzenean hizkuntza eskubideak urratzeari utzi diezaion. Rus eta Mendibil zentzu berean mintzatu dira, eta herritarrei emandako babesa eskertu nahi izan diete. Euskalgintza eta egoera larri hori bizi duten guraso zein haurrak bildu dira Golem Yamagutxin egindako aurkezpenean.