Kazeta.info webgunetik hartutako albistea:

Atzo arratsaldean onartu zen Asanblea Nazionalean Eskolaren berreraikuntzaren lege proiektua. Gobernamenduak Europako Hizkuntzen Karta onartuko ez duela jakin eta aste bete pasa ez denean eskualde hizkuntzendako bigarren kolpea ailegatu da. Eskualdeetako hizkuntzak hiru aldiz aipatzen dira legearen testuan, hiru artikulu ezberdinetan (18 bis,27 bis eta 94), baina ez dute ekarpen handirik egiten. Seaskako zuzendari Hur Gorostiagak argiki erran du: "Euskal Herriari ez dio ezer ekartzen, gibelapen onartezina da". Euskal Herriko hautetsiak lege berriarekin dezepzionatuta agertu dira, Collette Capdevielle sozialistak ere legean hizkuntzen tokia "puntu beltz" bat dela aitortu du.

18. artikuluan jarduera osagarriak eskualdeetako hizkuntza eta kulturaren ingurukoak izaten ahal direla dio.

27. artikuluan frantses hizkuntzaren erakaskuntzarendako profitatzen ahal baldin bada erakasleek eskualdeetako hizkuntzak baliatzen ahal dituela adierazten du, hori bai ikasleen ordezkari legelen baimenarekin.

Azkenik gehigarriaren 94. artikuluan aipatzen da "Eskualde hizkuntzak erabiltzen diren tokietan, haien erakaskuntza, nahi duten familiendako, faboretua izanen da".

Erreakzioak
Seaskako zuzendariak hitz gogorrak erabili ditu gobernamenduaren kontra: "Lege hau denbora galtzea da eta gure hizkuntzek ez dute denbora galtzerik". Aldi berean Gobernamenduan "elektroshok" bat beharko litzatekeela ere gaineratu du, eta horrelakorik gertatu ezean "François Hollandek gezurra erran digula erraiten ahalko dugu".

Collette Capdevielle deputatuak legean eskualde hizkuntzak ez egotea "puntu beltza" izatearekin batera aurrera pausu bat izan dela nabarmendu du: "Hasieran ez zen agertzen, beraz erreferentzia bat lortu dugu, nahiz eta idazkerak ez nauen asetzen".

Jokabide horri erantzuna eman dio Gorostiagak: "Entseiuak izan dira erraiteko aintzinamenduak izan direla, baina Euskal Herritik ez da aintzinapenik, gibelapen onartezina da".

Deputatuak bide bat ireki dela aipatu du eta hizkuntzen egora hobetzeko bi bide direla erran du: Marylise Lebranchu Deszentralizazio ministroak proposatu duen deszentralizazio legeari zuzenketak eginez eta Aurelie Filipetti Kultura ministroak sortu duen Eskualdeetako hizkuntzen promoziorako eta barne aniztasun linguistikoaren kontsultarako batzordea.
Kontsultarako batzordeko kidea den David Grosclaude Akitaniako kontesilari okzitaniarra ere haserre agertu da eskola erreformarekin: "Ez dirudi Estatuak inolako ardurarik hartu nahi duenik eskualdeko hizkuntzak deitzen diren horiekin. Kartarik ez da izan eta eskola hizkuntzen tokiari buruzko eztabaida karikaturazkoa. Hori baldin bada hizkuntza politika publikoaren oinarria, zaila izanen da zerbait sendoa eraikitzea. Aste batean agindutako neurri nagusiak lurrazpian gelditu dira".

UMPko departamentuko bozeramailea den Max Brissonek ere Hollandek hizkuntza mailan izan duen engaiamenduaren uztea salatu du, bereziki Europako hizkuntzen Karta onartu ez izana deitoratu du.

Pirineo Atlantikoetako presidente eta senataria den Georges Labazée sozialistak heldu den asteazkenean Senatuan prestaketa seantza izanen dela adierazi du, baina aldi berean bere ezintasuna ere nabarmendu du: "Senatore bat besterik ez naiz 343 senatariren artean".

Biga Bai burasoen elkartek ahalak emateko eskaera egiten du: "Eskolaren arraberitze legearen bidez, eskualde hizkuntzeri leku gehiago eman nahi zaiela Estadoak agertarazten duelarik, beharrezkoa da erakaskuntza hunen izariko ahalen plantatzea".

Proposamenak bertan behera

Legean eskualdeetako hizkuntzen tokia ttipia da azkenean, baina onartu aintzin, eta hizkuntzen toki egokia ziurtatzeko lan handia egin dute hainbat elkartek, gomendio ezberdinak emanez. Hezkuntza mailan hizkuntza gutxituen alde lan egiten duten estatu mailako hainbat elkartek gutun bat igorri zieten deputatu eta senatariei, "lege berrian eskualdeetako hizkuntzen aipamenik ez dela ikusirik kezka agertu nahi dugulako" eta horrekin batera ekarpen posibleak egin zituzten. Elkarte horien artean da Ikas-Bi eta beste eskualdeetako pareko elkarteak elkartzen dituen Flarep sarea atzematen dira, orotara 18 elkarte dira.

Lege berrian aipamenik ez izatea "oso keinu ezkorra" gisa hartuko luketela aipatuz legea ongi aztertu ondoren lau artikuluetan aldaketak egiteko bost proposamen egiten zituzten. Aldi berean "hizkuntza biziak" gisara definituak izatea eskatzen zuten.

Eranskinak: 

Berria

Gara/Naiz