Iragan urtarrilaren 9ko Nafar Parlamentuko osoko bilkuran hizkuntza eredu ezberdinetako ikasleen arteko elkarbizitza sustatzeko neurriak hartzea eskatu zuen Izquierda-Ezkerra koalizioak. Egun ikastetxe ezberdinetan ematen diren ereduak ikastetxe berean kokatzea eskatzen zuen ebazpenak aurrera egin zuen Izquierda-Ezkerra, UPN, PPN, PSN eta Geroa Baiko hautetsien babesarekin.

Ebazpen horren ondorioz jada aski urriak diren euskararen arnasguneak murriztu eta sustatu nahi ei den ustezko elkarbizitza hori halabeharrez gazteleraz izango dela ulertuta, EHEk ekimena egin zuen atzo eguerdian. Finean, iniziatiba parlamentarioaren bultzatzaile izan den koalizioa osatzen duten alderdien egoitzetako atarietan panel batzuk jarri eta ebazpenaren inguruko irakurketa jasotzen zituen esku-orriak banatu zituzten "Guk, eskola euskalduna!" lelodun petoa zeramaten EHEko dozena erdi kidek. Aipatu paneletan bi mezu ageri ziren: "Izquierda-Ezkerrak murgiltze eredua indargabetzen du" eta "Euskaraz dakienaren eta ez dakienaren arteko 'bizikidetza' zein hizkuntzatan izango da?".

Ekimen honen bidez ikasleak euskal curriculumaren baitan eta euskaldun eleanitz gisara heziko dituen eskola euskaldunaren alde egin nahi izan da eragile euskaltzaletik.