Manifestazioetan, gutun bidez eta beste makina bat eratan aldarrikatu dute dagokiena Baxoa Euskaraz dinamikan parte hartzen duten ikasleek. Abestuz egitera ere ausartu dira. Lapurdi, Behe Nafarroa eta Zuberoako euskal ikasleek urteak daramatzate Baxoa euskaraz egiteko eskubidearen alde lanean. Goi Mailako ikasketak egin ahal izateko gainditu beharreko froga da eta erdaraz egin behar izaten dute. Egindako lan eskergari esker Matematika eta Historia euskaraz egiteko aukera erdietsi badute ere, azterketa oro euskaraz egiteko eskubidea aldarrikatzen dute. Eskola euskaldunaren bidean, azpimarragarriak dira Alderdi Sozialistako parlamentari baten babesa lortu izana edota aurten abian jarritako gutun bidezko presio dinamika.