Uda honetan hezkuntza agintarientzat ez da oporrik izan. Jendarte baten eraikuntzan hezkuntzak duen garrantzia guztiz barneratuta dute, eta etxeko lana batzuk ongi beteta bueltatu zaizkigu ikasturte berri honetara.

EAEko ikastetxeetan urritik aurrera, 13 eta 16 urte inguruko 18.000 euskal ikasle baino gehiagok, Celaák diseinaturiko Bizikidetza eta biolentziaren deslijitimatze planaren irakasgaiaren aplikazioa pairatuko dute. Ikastetxe, irakasle, hezkuntza komunitate eta orokorrean, jendartearen oniritzirik gabe, plan “pedagogiko” hau bururaino eramateko urratsak ematen ari dira. Herri honetan bizi dugun gatazkaren existentzia aintzat hartu gabe, onaren eta txarraren irakaspena eman nahi digute. Bizikidetzaren inguruko irakaspena ematea helburu bada, pedagogikoa al da ikuspuntu zehatz batetik abiatutako heziketa? Herri honetan nor den biktima eta nor ez den horren modu partzialean zehazten duen proiektua onargarria al da?

Nafarroako Gobernua ere ez da atzean geratu. Alde batetik, Euskal Herriaren existentzia ezabatze bidean ezarritako testuliburuen sorgin-ehiza, Euskal Herria terminoa duten testuliburuak zerrenda beltzean jarri eta hauen erabilera mugatzeko diru-laguntzak kentzera bideratua dagoena. Eta bestetik abuztuan, ikasleak oporretan daudela aprobetxatuz, onartutako Ikasleen Eskubide eta Betebeharren dekretua, ikasleen eskubideak murrizten dituen zerrenda bat.

Zuberoa, Baxe Nafarroa eta Lapurdin ere, Euskal Hezkuntzak ez du bere garairik onena bizi, Estatu Frantsesetik euskarak inolako onarpen ofizialik gabe, ikastolen egoera zailtzen ari da. Gainera, EAEko gobernuko diru-laguntzak korapilatzen ari da eta zoritxarrez iraungitze data dute: 2010 urtea. Hori gutxi balitz, landa eskola eta eskola txiki ugarik bere ateak itxi beharrean aurkitu dira eskola mapa berriak txikiak baztertzen dituelako, hala, landa eremuen desertifikazioak aurrera darrai.

Unibertsitatean, Bolonia Prozesuan zeharo murgilduta hasi dute ikasturtea. Herrien beharren araberako ikasketak eta ikerketak burutzera baino, multinazional eta enpresa pribatuen zerbitzura makurtzen dira unibertsitateak, ikasleak lan makina izatera bideratuz eta irakasleen lan baldintzen prekarizazioan sakonduz.

Izugarria da azkenaldian hezkuntzari ematen dioten erabilera. Izan ere, Lege eta inposaketa guzti hauek, Estatu-politikaren logikaren barnean kokatu behar ditugu. Doktrinamendu espainiar zein frantsesa besterik ez dute helburu. Herri honen nortasun, kultura, historia, hizkuntza... ezabatu eta beraien araberako etorkizuneko jendarte sumiso eta akritikoa sortzea da guzti honen xedea. Legeak lege, ezarri nahi diguten tunel ilun honetan bada argi izpi bat. Azken urteotan, Hezkuntza Sistema Nazional baten aldeko mugimendua gorpuzten hasia da. Horren islada dugu iazko ikasturteko Martxoaren 13an Euskal Herriak behar duen Hezkuntzaren alde eta inposaketen aurka burututako manifestaldi Nazionalak izan zuen arrakasta.

Ez hori bakarrik. Egunotan Kilometroak edo Nafarroa Oinez ospatuko dira Pasaia-Lezon eta Atarrabian, hezkuntza euskaldun eta herritarrarekin konpromisoa duten milaka herritar bilduz. Hemendik hilabetera Ikasle Eguna eta manifestaldi nazionala egingo da Amurrion. Nafarroako ikasleek mobilizazio dinamika handia piztu dute eskubideak ezabatzen dituen dekretuaren aurka. Matrikulazio garaian, eskaintzen den lekuetan, D eredua da eredurik hautatuena, Celaá edo Catalánen kaltetarako. Guzti honek argi uzten du hezkuntzarekiko kezka egon, badela.

Inoiz baino beharrezkoagoa da Hezkuntza mugimendu hori artikulatzea. Ahalik eta sendoen. Inposaketei aurrean harresi bat eraikitzeaz gain, Hezkuntza Sistema Nazionala aldarrikatuko duena. Euskalduna eta Herritarra izango den Hezkuntza Sistema. Euskalduna hizkuntzaz (euskarazkoa eta euskaldunduko duena) eta edukiz (euskal nortasuna, ezagutza eta jakintzak oinarri izango dituena). Eta Herritarra, hezkuntza eskubideak bermatzen dituen hezkuntza zerbitzu publikoa: hezkidetzailea, kritikoa, pedagogikoa.
Irakasle, guraso, ikasle edo, sinpleki, hezkuntza egoerarekin kezkatutako edozein herritarrek egoera honi buelta emateko gaitasuna du. Euskal Herriak Bere Eskolan leku bat dute lan hori egin nahi duten guztiek. Guzti horiei deia egin nahi diegu herriz herri eta ikastetxez ikastetxe, batzen gaituena oinarri, eraso hauei ezezko sendo bat ematera! Argi utzi dezagun guk Hezkuntza sistema Euskaldun eta herritarra nahi dugula eta hau berau eraikitzeko eskubidea badugula! Egitera goazela!