Biltzar Nazional Katalanaren deialdiari erantzunez ehunka mila kataluniarrek burujabetzarako bidea irudikatu zuten giza-kate baten bidez iragan irailaren 11ko Diadan. Euskal Herrian Euskaraz bertan izan zen eta galdera bat luzatu zien katalan zein euskaldunei: ze paper jokatzen du hizkuntzak hautu burujabean?

Urtero legez, ikasturtean zehar landuko duten plangintza orokorra adostu dute EHEko taldeetako ordezkariek gaur goizean Ziburun egin duten Nazio Batzarrean. Errealitatearen irakurketa egin ostean, berau iraultzeko non eta nola eragin eztabaidatu dute. Gaur egungo testuinguru politikoan kokatu nahiz "Konponbidea" atala gehitu diote Oinarri Ideologikoen esparruari, konponbidearen inguruko irakurketa eginaz. Bestalde, "Euskaraz Bizi" dinamika urte osoko ekinbidearen oinarritzat joagatik, udal administrazio eta hezkuntzaren aferek pisu berezia izan dezaten adostu dute.

Irailaren 7an Zarautzen ospatu zen Euskaraz Bizi egun arrakastatsua probestuz, manifestu bateratua atera dute argitara Zarauzko AEK zein EHEk. Euskalduntasunaren giltzarria euskara izanik, “hemen jaiotakoa, 70 urterekin ikasten hasi dena, atzerritik etorri dena edo oraintxe Londonen jaiotzen ari dena” izan gaitezkeela euskaldun gogorarazteaz bat, euskaraz jardun eta “kosmopolit” bizitzeko deia luzatu dute. Hangoa, horkoa, hemengoa… euskaraz bizitza, kosmopolitagoa!

Diada egunez Katalunian egin den giza kate historikoan partaide izan da Euskal Herrian Euskaraz ere. Arrazoia argia: euskararen normalizazio bidean ezinbesteko diren hizkuntza politikak legez kanpokoak dira egungo markoan. Horrexegatik egiten du egungo kateak hausteko apustua, hots, bertatik bertara erabakitako eta kanpo esku hartzerik gabeko hizkuntza politika burujabeak gauzatu ahal izateko. Euskal Herri euskaldunerako bidea gaurdanik urratzeko deia luzatu du.

Bi Estatuek zein Urruñako udalak euskarari "beti oztopoak jartzen" dizkiotela iritzita, eta era berean urruñatarren hizkuntza jarrerak irauli nahiz, Urruñako EHE taldea sortu dute hiru kidek, bi laguntzaileren babesaz. "Urruñan euskaraz bizi" ekimena martxan jartzeaz batera, "Euskaraz Bizi" gaualdia antolatu dute irailaren 20rako. Ikus litekeen lez, gogotsu ekin diote jardunari. Aurrera, bada!

Altsasuko EHEk murala egin berri du, mezu argi batekin: “Ez zaitez espaloitik jaitsi!”. Horri hertsiki lotuta agindua betetzeko modua: oztopoez gaindi euskaraz bizitzeko hautua egitea alegia.

"Euskalduna naiz eta arraro nago!" bakarrizketak ia 50 saio bete ditu. EHEren eskutik "Barry Barrez" zein "Baltziskueta" hamaika herri igaro dituzte jada euskaraz bizitzearen aldeko aldarriarekin.

Eusko Jaurlaritzako Prospekzio Soziologikoko Kabineteak argitara atera berri duen ikerlanak Araba, Bizkaia eta Gipuzkoako baldintza soziolinguistikoak "gaztelaniaren aldekoak" direla ondorioztatu du. Zaharrak berri. Horren aurrean, "elebitasun sozial orekatua" helburu, Patxi Baztarrikak interbenitu beharra azpimarratu du, zer esparrutan edota zer neurri hartuz eragin beharko litzatekeen argitu gabe. Bestalde, eta zeharkada bada ere, euskaldun eleanitzez osatutako Euskal Herri euskalduna ameskeriatzat jo du.

Carlos Urquijo Espainiako Gobernuak  Araba, Bizkaia eta Gipuzkoan duen ordezkariak bultzatuta Estatuko Abokatuak Lezo, Anoeta eta Zestoako udalen hizkuntza irizpideei helegiteak jarri zizkien. Erabaki horrek beste 33 herri erakunderen hizkuntza irizpideak auzitan jarri ditu. Honen aurrean kikildu ez, eta Zarauzko udalak erabaki ausarta hartu du, adostasun zabala lagun: irailetik aurrera herritarrekin euskara hutsean ariko dela jakinarazi du, "euskaldunak bigarren mailako herritarrak izateari uzteko erabaki garrantzitsua" hartuz, Gari Berasaluze euskara zinegotziaren hitzetan. Neurri horrekin euskaraz bizitzea oztopatu nahi digutenei ere mezu garbia helarazi zaie inplizituki: "ez gara espaloitik jaitsiko!"