Zarautzen ekainean ospatutako jaietan paella lehiaketa eta honen ondoren baltsa karrera ospatu zuten. Bertako euskalgintzak ere parte hartu zuen, Zarauzko EHEk barne, paella prestatzen lehenengo eta baltsa karreran ondoren. Euskararen aldeko aldarria kolore berdez nonahi!

Anoeta eta Lezok hartutako neurrien helegitearekin hasi zuen Estatu Espainoleko abokatuak Zestoarekin jarraitu eta beste 33 herri erakundetara iritsi daitekeen erasoa.

Hasi dira udara partean Euskal Herriko herri eta auzoak alaitzen dituzten jaiak, eta gainean ditugu, horien artean, Oreretako Madalenak. Bertako Euskalguneak hamar urte beteko ditu aurten, eta egitarau berezia prestatu dute ospakizunerako. Abestia ere egin die Sardeska musika taldeak. Zatozte Oreretako Madalenetako Euskalgunean jaia euskaraz gozatzera!

"(...)  euskaraz aritzeko oztopoek sortzen duten ezintasunaz gain, tratu zakarra eta errespetu gabekoa eta euskaldunon duintasunaren eta nortasunaren kontrako jarrera adeigabeak ere jasan behar izan dituzte"

Arrasateko Gazte Euskaltzaleen Topaguneak “Ez jaitsi espaloitik” kalejira eta olinpiadak antolatu ditu iragan berri diren San Juanetan. Gazteleraren espaloira pasatzeko joera baztertu eta euskararen espaloian mantentzeko erabakia hedatu nahi dute gazteen artean.

Hiru urte atzera Oiartzungo Haurtzaro Ikastolak martxan jarri zuen proiektu pilotuaren aurka azaldu da bertako euskalgintza. Eredu horrek ez duela ikastetxeek ikasle euskaldunak heztea bermatzen salatu dute euskaltzaleek eta Haurtzaro Ikastolak eredua martxan jartzeko hartutako erabakiaren larritasunaz ohartarazi dute. Arduraz jokatzeko eskaria luzatu diote ikastolako arduradunei.

Donostiako Euskal Herrian Euskarazeko kideek Ezabatu eta Euskaraz Bizi dinamika martxan jartzea erabaki dute. Bertako hizkuntza zapalketa egoeran dagoela-eta, orain arteko udal gobernuek egoera honetaz jabetu eta beharrezko aldaketak egin ordez egoera normaltzat hartu dutela salatu dute eragile euskaltzaleko kideek.

Urtero bezala Iruñeko San Ferminetara hurbiltzen direnek Jarauta kaleko Depor tabernan izango dute Euskal Herrian Euskaraz-ekin bat egiteko parada. Herri mugimenduko eragile euskaltzaleak aurtengo jaietarako prestatu duen egitarauaren baitan bazkari herrikoiak eta kontzertuek dute protagonismo nagusia. Alta, ez da herri mugimenduko eragileek Iruñeko kaleetan izango duten txoko bakarra. Afixan duzue herri mugimenduko tabernen mapa.

Euskaraz Bizi Egun txikia egin zen Durangon iragan ekainaren 8an. Bertan bizitakoa jaso du Durangoko Euskal Herrian Euskaraz-ek hemen ikusgai duzuen bideoan.

'Euskal Herrian gure hezkuntza eraiki. LOMCEri ez! Inposaketarik ez!' lelopean egingo dute manifestazioa urriaren 12an Bilbon. Deialdiaren atzean hezkuntza eragileek lortu duten adostasun multzoa dago. Ikasle guztien garapen osoa bermatuko duen heziketa garatzea, Euskal Herriarentzat curriculum propioa osatzea, ikasle eleaniztunak sortuko dituen hizkuntza eredu bakarra ezartzea, hezkuntzaren kudeaketan hezkuntza komunitatearen zein herritarren parte hartzea bermatzea eta aurreko puntuak barnebilduko dituen marko normatibo propioa sortzea daude aipatu adostasunen artean. Lehen neurri gisara, Wert legea ez aplikatzea galdegin diete Araba, Bizkaia, Gipuzkoa eta Nafarroako legebiltzar eta gobernuei.