Beste behin ere, Nafarroako Gobernuko alderdiaren borondate politiko makurrari men, euskara erabat baztertzen duen Lan Deialdi Publiko berri baterako azterketa egin da gaur goizean, Nafarroako Unibertsitate Publikoaren instalazioetan. Euskal Herrian Euskaraz (EHE) eta Administrazioan euskaraz eragile euskaltzaleek gogor salatu dute, euskara eta euskaldunok bazter uzten gaituztela argudiatuz.

EHEk ohar baten bidez azaldu duenez, “Nafarroako Ogasuneko langile izateko lanpostua lortzeko xedearekin aipatu azterketara aurkeztuko direnek, ingelesa ezagutuz gero, erdietsitako puntuazioa ehuneko 10ean igotzeko aukera edukiko dute”.  Bejondeiela.

Aldiz, "azterketara aurkeztu direnek euskara ezagutzeak, ongi menperatzeak edo zerbitzua euskaraz eskaintzeko gaitasuna izateak ez dute azterketaren emaitzari begirako eraginik izango". Eragile euskaltzalearen irudiko, “ez da kontu berria, ez da kasualitatea. Aspalditik datorren afera da, eta euskara zein euskaldunik gabeko Nafarroa xede dutenen borondate politikoari zor zaio”.  Iaz, Nafarroako Gobernuak esleitutako Lan Deialdi Publikoetara aurkeztu ziren bi lagunek aipatu egoera errekurritu zuten administrazioaren aurrean. Lehenik Nafarroako Gobernura jo zuten. Honen isiltasunaren ondotik, Francisco Javier Eneriz Nafarroako Arartekoari helarazi zioten kexa, eta honek egindako ikerketak ondorioztatutakoaren arabera ere, “euskara bertako hizkuntza eta ofiziala den heinean, euskara atzerriko hizkuntzen gainetik baloratu behar da”.

Salatu duten eran, baina, “Nafarroako Gobernuak ez du Arartekoari jaramonik egiteko asmorik”, eta “halaxe frogatu du Enerizen ikerketaren ostean egin diren bi Lan Deialdi Publikoetan”. Gainera, “trikimailuak” erabili ditu euskara Nafarroako bizitza publikotik zein bestelako eremu orotatik desagerrarazteko: “Nafarroako Aldizkari Ofizialean publikatu ez den 2489/2009" ebazpenaren arabera A eta B mailako oposizio guztietan ingelesari %10 arteko puntuazioa eman ahal zaio. Euskara puntuatzea eskatzen denean, aldiz, Nafarroako Gobernuak esaten du oposizio bat dela, ez lehiaketa oposizioa, eta ez duela merituak (eta beraz, euskara) puntuatzeko betebeharrik. Ingelesa ez da tituluak egiaztatzearen bidez baloratzen, azterketa bidez baizik, eta zentzu horretan ez du meritu gisara baloratzen”.

Bestalde, "lanpostu batean euskara baloratzea eskatzen denean Gobernuak esaten du plantilla organikoan ez dagoela jasota hizkuntza-profilik, eta hortaz ez dela euskara jakitea eskatuko. Alta, 2009tik hona A eta B mailako oposizio guztietan ari dira ingelesa baloratzen, plantilla organikoan postu horietarako ingelesaren profilik ez dagoen arren".

Halarik ere, EHE-ren ustez eztabaida ezin da egon azterketa baterako euskarak ingelesarekin konparatuz izan behar duen balioan. Arazoari irtenbidea emateko “abiapuntu okerra" da hori. Izan ere, “euskara nahitaezko baldintza izan behar da euskal administrazio ezberdinetarako lanpostu publiko bat lortzeko tenorean”. Bestela, “ezinezkoa da herritarrek administrazioarekin zein euren egunerokoan euskaraz bizitzeko duten eskubidea bermatzea”. Areago, horren ondorioz “euskara eta euskaldunak enegarren mailakoak gara euskararen herrian bertan”.

Eraso berriari erantzun egingo dioten euskaldunak ez daudela erantzuteko “soilik” adierazi dute. Erantzunez haraindi “euskaraz biziko den herria eraikitzeko ere bagaude”. Zentzu horretan, “Nafarroak behar duen aldaketa aldarrikatzen duten ahotsei lotzen diegu geurea, erroko aldaketa behar baita Nafarroan. Kanpo esku hartzerik gabe, bertatik eta bertara erabaki eta garatuko dugun hizkuntza politika burujabeak behar ditugu behingoz”.

Norbanakoongan kokatu dute lehen gakoa, giltza. Euskaldun burujabe gisara jokatu behar dugu, “euskaraz bizitzeko hautua egin eta euskararen alde egotetik euskararen alde egitera igaro behar gara”. “Aldaketa pertsonal txikiak” ekarriko ei ditu “aldaketa sozial kolektiboak”. Honek, berriz, “aldaketa politikoak”.  Eta “aldaketa politikoetatik etorriko dira, nahitaez, euskara dagokion lekura eraman dezaketen aldaketa juridikoak: euskara euskal administrazioetako langile izateko ezinbertzezko baldintza izatea eragingo duten aldaketak, kasu”.