Euskaraz bizi nahi dutela aldarrikatuko dute larunbatean Zaraitzu ibarrean (Nafarroa). Otsagabian abiatuko dute eguna, eta ondotik manifestazioa eginen dute Ezkarozera "Euskarari erasorik ez!' lemapean. Bigarren herri horretan izanen dira egitarauko ekitaldi gehienak. Besteak beste, Zaraitzu AEK euskaltegiaren inaugurazio ekitaldia eginen dute. Antolatzaileek esan dutenez, egunean zehar lortutako etekinak 2010eko Zaraitzuko Euskararen Egunean jasotako isunak ordaintzeko erabiliko dute.  7.500 euroko isuna jaso zuen herritar batek kartelak paratzeagatik.

Zaraitzukoa ez da Nafarroa Garaian euskararen alde eginen den ekitaldi bakarra. Argako Mirandan ere Euskararen Eguna ospatuko dute hamargarreneko aldiz. Bertako Euskararen Lagunak elkarteak antolatu du egun osorako egitaraua, herriko hainbat eragile eta norbanakoren laguntzarekin. Etxarri-Aranazen, berriz, Euskal Festa ospatuko dute.