Bi neurri hartu ditu PSEk aste honetan, biak hizkuntza normalizazioaren aurkakoak. Alde batetik, Isabel Zelaak esan du euskara jakintza ziurtagiria emanen dietela ikasgaien %50a euskaraz egiten dituzten ikasleei. D ereduko ikasleek ere ziurtagiria lortuko dute, eta unibertsitateko ikasketak euskaraz egiteagatik EGAren maila aitortuko zaio ikasleari. Bestalde, Kontsumitzaile eta Erabiltzaileen Legea aldatzeko bideari ekin dio PSEk, PP eta UPDren laguntzarekin. Euskaraz errotulatzen edota artatzen ez duten komertzioak zigortzen dituen legea deuseztatu nahi dute.

13.560 zenbakiaren jabearentzat da EHEk bi lagun Eskoziara eramateko zozketatu duen bidaia. Irabazlea zeu bazara, jarri harremanetan gurekin ohiko bideetatik. Zorionak!

17. Korrikak Arabatik Nafarroara bidea hartu zuen eta herri euskaldunaren aldeko lasterketa asteburu osoa Nafarroa Garaitk ibili da.  Gaur Lapurdira bidea hartu du. Tafallan ere ehundaka lagunek egin zuten euskaraz bizitzeko bidea, EHE-ren kideek ere euren aldarrikapena egin zuten euskararen ofizialtasuna aldarrikatuz.

Milaka lagun etorri dira Trebiñura Korrika 17-ri haisera ematera. 2000 Km baino gehiago egingo ditu Donostiara apirilaren 17an heldu bitartean. EHEren hainbat kidek ere Korrika hasieran hartu dute parte. "Euskalduna naiz eta harro nago" lelodun kamiseta berdea jantzita ekin diote bideari EHEren kideek, eta Euskal Herri osoa zeharkatuko dute horrela. Euskaldun izatearen harrotasuna lau haizetara zabalduz euskaraz bizitzeko bidea egitera deitu du EHEk.

Euskal Herrian Euskaraz-ek bere 30. urtemugaren karietara egindako Izan, egin, eragin. Euskal Herrian Euskaraz dokumentalak bide luzea egin du dagoeneko. Jada 50 bat aurkezpen egin ditu Euskal Herri osoan zehar, eta apirilaren 8an Euskal Herritik kanpora egingo du salto, Bartzelonako Euskal Etxeak Korrikari begirako egitarauan txertatu baitu dokumentalaren aurkezpena. Ehunka euskaltzalek ikusi du herriz herri eta emanaldiz emanaldi EHEren filma, eta saretik izan duen hedapen zabala kontuan hartuta, ikusleen zerrenda biderkatu egin da. Datozen egun eta asteotan, Ondarroan, Añorgan, Iruñean, Hondarribian eta Uribarrin ikusi ahal izango da.

Euskaraz Bizi Eguna aurrera doa, eta oraindik gaueko parte osoa falta den arren lehen balorazioa egiteko unea iritsi da. Bertso bazkarian 500 lagun inguru bildu dira giro hobezinean. Sasi guztien gainetik euskaraz bizi! lelopean abiatu den manifestazioa aldiz mila euskaltzale baino gehiagok babestu dute. Manifestazioaren osteko ekitaldian euskaraz bizitzearen aldeko aldarria zabaldu ostean kontzertuek hartu dute jendez lepo dagoen Gernika-Lumoko Pasealekua.

Hasi da Gernika-Lumon aurtengo Euskaraz Bizi Eguna. Euskaltzale andanak egin du bat EHEren deialdiarekin eta goizeko 11:00etatik aurrera hasi den egitarauak herritarren parte hartze zabala izan du. Erakusketak, tailerrak, "Euskalduna naiz eta harro nago!" mendi-martxari harrera, gaiteroak, kale animazioa eta soka tira saioak arrakasta izan dute. Jaia eta aldarrikapena uztartuz euskaraz bizitzearen aldeko hautua egin dutenek 500 pertsonentzako bertso-bazkarirako bidea hartu dute iada. Ikus behean argazkiak. Laster berri gehiago!

Datorren larunbatean ospatuko da Gernika-Lumon Euskaraz Bizi Eguna. Gaurkoan, EHEko kideek eta Euskaraz Bizi Eguneko egitarauan eta prestaketa lanetan parte hartu duten eragile eta norbanakoek agerraldia egin dute euskaraz bizi nahi duten guztiei jaia eta aldarrikapena uztartuko dituen egunean parte hartzeko deia egiteko. Euskaraz biziko den herrirantz egiteko dugun bidean auzolanetik emango ditugu urratsak nahitaez, eta euskaraz bizitzearen aldeko hautua indartzea helburu duen Euskaraz Bizi Eguna auzolan horren beste adierazle bat izango da

2004an hasi ziren Hizkuntza Eskubideen Egunak atzean utzita iaz Etxarri-Aranatzen bidea hasi zuen Euskaraz Bizi Egunaren aurtengo edizioa aurkeztu du EHEk Donostiako Koldo Mitxelena Kulturgunean. Heldu den martxoaren 19an ospatuko da bigarren Euskaraz Bizi Eguna Gernika-Lumon, eta egitarau zabala ekarriko du berekin. Egun osoko haurrentzako txokoa, tailerrak, kale-animazioa eta abarrez gain, ehunka pertsonarentzako bertso-bazkaria, Betagarri, Sarkor eta Joxpa taldeekin kontzertua eta erromeria, eta "Sasi guztien gainetik euskaraz bizi!" leloa eramango duen manifestazioa eta ondoko ekitaldia izango dira ekimenik aipagarrienak. Azpian dituzue kartela eta egitaraua.

Manifestazioa egin du EHEk Donostian "Sasi guztien gainetik, euskaldun eta burujabe!" lelopean. Eguraldi kaskarrari aurre eginez, milaka izan dira EHEren deialdiari gogo betez erantzun dioten herritarrak. Manifestazioaren burua Artzai Onaren atarira iritsi denean, oraindik udaletxe paretik ari ziren ateratzen mobilizazioaren azken ilarak. Bukaerako ekitaldian merezitako omenaldia egin zaio Txillardegiri, eta ondoren heldu den martxoaren 19an Gernika-Lumon egingo den Euskaraz Bizi Eguna iragarri dute EHEko kideek.