Euskararen alde egotetik euskararen alde egitera pasatuz osasungintzan euskaraz egin ahal izango dute zumaiarrek. Zumaiako anbulatorioan euskara gaitasunik ez zuten mediku eta pediatra bana jarri zituen Osakidetzak eta horrek herritar eta guraso talde baten erantzuna eragin zuen. Osakidetzak egoera konpondu du, mediku eta pediatra euskaldunak ekarri ditu, eta gaur aldarrikapenaren bultzatzaileek agerraldi publikoa egin dute  Udalaren, Behatokiaren eta dozenaka lagunen babesarekin, gertatutakoaren irakurketa egiteko.

Ihintz Lizanisorok irakurri du oharra, guraso eta herritar taldearen izenean: “Zumaiako herritar eta guraso moduan gure kezka azaldu nahi izan dugu herriko Osasun Zentroan sortu den egoerarekin. Zumaian urte luzez jardun den pediatrak bere zerbitzuak emateari utzi zion eta ordez etorri zen medikuak ez zekien euskaraz. Horri gehitu behar zaio lehendik dagoen beste pediatra ere ez dela moldatzen euskaraz. Beraz, Zumaian pediatra euskaldunik gabe gelditu ginen egun batetik bestera”.

Zumaiako haur gehienek ez dute gaztelera menderatzen koskortzen diren arte. Horren ondorioz, "haurrentzat, sarritan, ez da batere erraza izaten medikuarengana joatea, batzuk estutasun handiz joaten dira eta estutasun horretan gainera, beraiek ezagutzen ez duten hizkuntza bat entzuteak (gaztelera), oraindik eta gehiago estutzen, urduritzen eta larritzen ditu". Euskaraz osasuntsuago daudela alegia. Haurrek beraien beldur, estutasun eta guzti, "ahots goxoz, hitz ulerkorrez" hitz egingo dien norbaitek artatuak izan daitezen merezi dutela aldarrikatu dute. Elkarlanean, hori hala izan dadin ere lortu dute.

Gaizki ulertuak ekiditeko, tartean kontu pertsonalik ez dagoela eta guraso moduan Zumaiara etorri diren medikuen kontra ez daukatela "ezer" gehitu dute. Ez dute "inola ere" beraien profesionaltasuna zalantzan jartzen. Hala ere, "mediku ona eta mediku euskalduna kontzeptu oso bateragarriak direla" eta honenbestez, "mediku baten perfil egokia ez duela medikuntzari buruz dakienak bakarrik markatzen” uste dute.

"Gustora" agertu dira profesional euskaldunak etorri direlako herrira. Oraindik, baina, badute zereginik. Adierazi dutenez, oraindik ere bada herrian pediatra bat euskaraz moldatzen ez dena eta oporrak ordezkatzera datorren medikuak ere askotan ez dute jakiten euskararik. Lanean jarraituz gero, lortuko dute.